ប្រេស៊ីល៖ ចៅក្រមតុលាការកំពូលប្រេស៊ីល លោក Alexandre de Moraes បានបង្គាប់ឱ្យលោក Elon Musk មហាសេដ្ឋីអាមេរិកដែលជាម្ចាស់បណ្ដាញសង្គម X (អតីតកម្មវិធី Twitter) ឱ្យដាក់ឈ្មោះអ្នកតំណាងស្របច្បាប់សម្រាប់បណ្ដាញសង្គម X នៅក្នុងប្រទេសប្រេស៊ីលក្នុងរយៈពេល ២៤ម៉ោង បើមិនដូច្នោះទេកម្មវិធីផ្ញើសារបណ្ដាញសង្គមនេះ ប្រឈមនឹងការផ្អាកលែងឱ្យដំណើរការនៅក្នុងប្រទេសប្រេស៊ីលដែលមានប្រជាជនប្រមាណ ២១០លាននាក់នេះ។ 

នៅដើមខែសីហា កម្មវិធីបណ្ដាញសង្គម X បានប្រកាសថា ខ្លួននឹងបិទប្រតិបត្តិការរបស់ខ្លួន និងបញ្ឈប់បុគ្គលិកនៅក្នុងប្រទេសប្រេស៊ីលទាំងអស់ ដែលជាការឆ្លើយនឹងសកម្មភាពរបស់លោក Alexandre de Moraes ដែលលោក Elon Musk ចាត់ទុកថាជាសកម្មភាពបង្គាប់ឱ្យត្រួតពិនិត្យលើបណ្ដាញសង្គមនេះ។ 

តុលាការកំពូលប្រេស៊ីលបានបង្ហោះរូបភាពនៃសេចក្ដីសម្រេចនេះនៅលើបណ្ដាញសង្គម X កាលពីថ្ងៃពុធម្សិលមិញនេះ ដោយប្រើប្រាស់គណនី X ផ្លូវការរបស់តុលាការតែម្តង ដោយភ្ជាប់ជាមួយ (Tag) គណនីរបស់លោក Elon Musk និងគណនីកិច្ចការរដ្ឋាភិបាលសកលរបស់បណ្ដាញសង្គម X ជាមួយគ្នាផងដែរ។

នៅក្នុងសេចក្ដីសម្រេចនេះ ចៅក្រមតុលាការកំពូលប្រេស៊ីលបានថ្លែងថា នៅក្រោមច្បាប់គ្រប់គ្រងបញ្ហាអ៊ីនធឺណិតរបស់ប្រេស៊ីល ក្រុមហ៊ុនដែលមិនគោរពច្បាប់របស់ប្រទេសប្រេស៊ីល ឬបំពានលើការរក្សាការសម្ងាត់នៃព័ត៌មានឯកជនអាចនឹងត្រូវផ្អាកសកម្មភាពរបស់ក្រុមហ៊៊ុនទាំងនោះជាបណ្តោះអាសន្នបាន៕